ITI admission Maharashtra 2025: राज्यातील औद्योगिक प्रशिक्षण संस्थांमधील (आयटीआय) प्रवेश प्रक्रिया १५ मे पासून सुरू होत आहे. व्यवसाय शिक्षण व प्रशिक्षण विभागाने वेळापत्रक जाहीर केले आहे. त्यानुसार विद्यार्थ्यांना अर्ज भरता येणार आहेत.
पहिल्या फेरीसाठी विकल्प सादर करण्याची प्रक्रिया २६ मे पासून सुरू होईल. संस्थेत मार्गदर्शन केंद्र सुरू केले जाणार आहे. अर्ज भरण्याची अंतिम तारीख लवकरच जाहीर होईल.
दहावी निकालानंतर विद्यार्थ्यांचे आयटीआय अभ्यासक्रमांच्या प्रवेश प्रक्रियेकडे लक्ष लागले होते. व्यवसाय शिक्षण व प्रशिक्षण संचालनालयाने बुधवारी २०२५-२६ शैक्षणिक वर्षाचे वेळापत्रक जाहीर केले. यात प्रवेश प्रक्रियेत अर्ज भरण्याची प्रक्रिया, प्रवेश अर्ज निश्चितीची प्रक्रिया १५ मेपासून सुरु होते आहे. प्रवेशाची माहिती पुस्तिका वेबवाईटवर उपलब्ध करून देण्यात येणार आहे. विद्यार्थ्यांना वर ऑनलाइन अर्ज भरता येणार आहे. यात राखीव प्रवर्गासाठी शंभर रुपये, अराखीव विद्यार्थ्यांसाठी दीडशे तर राज्याबाहेरील विद्यार्थ्यांसाठी तिनशे रुपये शुल्क असणार आहे.
प्रवेश अर्जात विद्यार्थ्यांनी मोबाइल नोंदविणे आवश्यक आहे. एका मोबाइल क्रमांकावर केवळ एकच प्रवेश अर्ज नोंदविता येईल. हा मोबाइल क्रमांक प्रवेश प्रक्रिया पूर्ण होईपर्यंत बदलता येणार नाही. प्रवेश अर्ज निश्चितीसाठी विद्यार्थ्यांना आवश्यक त्या कागदपत्रांच्या छायांकीत प्रतींचा एक संच, तात्पुरत्या प्रवेश अर्जाची छापील प्रत नजिकच्या आयटीआयमध्ये पडताळणीसाठी सादर करावयाची आहे. कागदपत्रांची तपासणीनंतर विद्यार्थ्यांना ‘अर्ज निश्चितीकरण पावती’ व निश्चित केलेल्या प्रवेश अर्जाची प्रत देण्यात येईल. यासाठी कोणतेही शुल्क लागणार नाही. उमेदवाराने एकच अर्ज भरावा. एकापेक्षा अधिक अर्ज भरल्यास त्या उमेदवाराचे सर्व अर्ज रद्द होतील, असेही संचालनालयाने स्पष्ट केले आहे.
समुपदेशन केंद्र – संचालनालयाने विद्यार्थी, पालकांसाठी समुपदेशन कक्षाची स्थापना करण्याचे निर्देश संस्थांना दिले. केंद्रातून सकाळी १० ते ११ या वेळेत नि:शुल्क मार्गदर्शन सत्र आयोजित केले जाणार आहेत. प्रवेशासाठी लागणारी कागदपत्रे, संस्थेत चालू असलेल्या अभ्यासक्रमांची माहिती, व्यवसायाचा कालावधी व विद्यार्थ्यांना प्रवेशांमध्ये येणाऱ्या इतर अडचणींवर माहिती देण्यात येणार आहे. यासह प्रवेश पद्धती, नियमावली, तांत्रिक अडचणींबाबत सकाळी १० ते सायंकाळी ६ वाजेपर्यंत संपर्क साधता येणार आहे.
ऑनलाइन प्रवेश अर्ज करणे- १५ मे पासून
प्रवेश अर्ज निश्चिती करणे- १५ मे पासून
पहिल्या फेरीसाठी विकल्प, प्राधान्य सादर करणे- २६ मे पासून
