आज दिनांक १४|०४|२०२६ रोज मंगळवारला शूरवी महिला महाविद्यालय, मूल येथे डॉ. बाबासाहेब आंबेडकर यांची जयंती उत्साहात व प्रेरणादायी वातावरणात साजरी करण्यात आली. कार्यक्रमाची सुरुवात भारतरत्न डॉ. बाबासाहेब आंबेडकर यांच्या प्रतिमेला पुष्पहार अर्पण करून व दीपप्रज्वलनाने करण्यात आली. उपस्थित मान्यवरांनी त्यांच्या कार्यास अभिवादन करून कार्यक्रमाला सुरुवात केली.
डॉ. बाबासाहेब आंबेडकर यांनी भारतीय समाजातील अस्पृश्यता, जातीय भेदभाव, सामाजिक अन्याय आणि विषमता याविरुद्ध कठोर लढा दिला. त्यांनी शिक्षणाला अत्यंत महत्त्व देत वंचित आणि दुर्बल घटकांना मुख्य प्रवाहात आणण्यासाठी आयुष्यभर कार्य केले. भारतीय राज्यघटनेचे शिल्पकार म्हणून त्यांनी देशाला समानता, स्वातंत्र्य आणि बंधुता या तत्त्वांवर आधारित लोकशाही व्यवस्था दिली. त्यांच्या “शिका, संघटित व्हा आणि संघर्ष करा” या संदेशातून अनेकांना जीवनात पुढे जाण्याची प्रेरणा मिळते.
तसेच, त्यांच्या कार्याची माहिती आणि विचारांचे महत्त्व महाविद्यालयातील कार्यकारी प्राचार्या कु. हर्षा खरासे यांनी सविस्तरपणे विद्यार्थिनींना सांगितले. त्यांनी विद्यार्थिनींना डॉ. आंबेडकरांच्या आदर्शांचा अंगीकार करून शिक्षणाच्या माध्यमातून स्वतःचा आणि समाजाचा विकास साधण्याचे आवाहन केले.
सदर कार्यक्रमास महाविद्यालयातील सर्व प्राध्यापक, शिक्षकेतर कर्मचारी तसेच मोठ्या संख्येने विद्यार्थिनी उपस्थित होत्या. कार्यक्रम अतिशय उत्साहपूर्ण, शिस्तबद्ध आणि प्रेरणादायी वातावरणात संपन्न झाला.
